Albisteak

Hemen eta orain yoga eta meditazio saioak

Osteguna, 2018ko martxoaren 22a

Emuneko hainbat lankidek astean behin Hemen eta Orain yoga eta meditazio saioak egiten ditugu. Astean ordu eta erdi ingurukoak dira saiook eta irakaslea Emuneko Amaia Rodriguez da.

Eta zertarako egiten ditugu saio horiek? Hona hemen parte hartzaileek diotena:

Hemen eta orain saioetan norbanakoa bere buruarekin zentratzea, energetikoki orekatzea eta osasunaren prebentzio psikosoziala egiten laguntzea bilatzen dugu. Arnasketa oinarri hartuta gorputzetik abiatzen gara, presentzia edo beste modu baten esanda, hemen eta orain gertatzen denaren kontzientzia areagotzeko eta eguneroko egoeretarako baliagarriak zaizkigun tresnak lantzeko. Saio hauek estres egoerak gutxitzeko, gorputz posturak hobetzen laguntzeko eta azken finean bizitza osasuntsuago bat eramaten laguntzeko dira. Talde kohesioa eta lankideen arteko harremanak sendotzeko ere balio dute saio hauek.

Irakurtzen jarraitu...

Ekonomia sozial berria eta ekintzailetasun soziala sustatzeko programa da KoopFabrika, proiektu profesional eta ekimen sozio-ekonomikoak martxan jartzen laguntzen duena. Aurtengo edizioko ataletako bat saretze eguna izan da eta bertan izan da Emun ere, uste baitugu bata eta bestearen esperientziak eta ikusmoldeak trukatzea dela guztion proiektuak aberatsago egiteko bidea. Baina zer du Emunek besteen interesekoa izan daitekeena?

Euskara eta Berrikuntza Soziala garela diogu Emunen. Sinesten dugu gizarte justuago bat posible dela eta gure lana lotzen dugu helburu horrekin. Beti egin dugunetik eta egiten dakigunetik, gure hondar alea jarri nahi dugu horretan, euskararen eta hizkuntza gutxituen normalizazioaren aldeko lana adibidez, mundu justuago baten alde egiten dugun ekarpena da, edota kultura zerbitzuak, parte-hartze nahiz aniztasun eta immigrazio zerbitzuak eskainita egiten duguna.

Baina gehiago ere egiten dugu jada. Justizia eta berdintasun klabeetan sakonduz goaz Emunen bertan eta Emunetik kanpoko gure lankidetzatan.

Pertsona erdigunean jartzen dugu Emunen, hala, gure enpresa kulturan pertsonak zaintzea eta baldintza duinak eskaintzea etengabeko ahalegina da. Emunen berariaz lantzen dugu genero berdintasunaren gaia; lana eta kontziliazio parekidea eta erantzunkidea errazteko neurriak hartu eta urratsak emanaz goaz (lan egutegi eta ordutegi malgua, murrizketa eta eszedentzia aukerak, etxetik lan egiteko aukerak, ordaindu gabeko baimenak hurbilekoren baten gaixotasun larrien kasuan, zaintzarako nahiz norbere garapen edota gizarteko proiekturen batean parte hartzeko,…).

Gizarte eredua aldatzen ari da eta egungo beharrei erantzuten saiatzen gara Emunetik eta etxekoengandik hasita.

Bide horretan sakontzeak onurak dakarzkigula ikusten dugu, 3 planotan ekarri ere:

Pertsonentzat onura: gogobetetzean, osasunean, errekonozimenduan

Enpresarentzat onura: pertsonak erakartzeko, etekin ekonomikoetan (absentismoa, zerbitzua ematerakoan, …), kooperatiba moduan gure printzipio eta balioekin bat eginez

Gizartean onura: erantzukizun sozialari egindako ekarpena (berdintasuna+ berdintasuna+zaintzarako…).

Genero berdintasunaren gaiarekin batera inklusio sozialaren gaian ere sakonduz goaz, trantsizio energetikoaren gaia ere mahai gainean dugu eta jada hasiak gara Emunek ingurumenean duen eragina neurtu eta berau gutxitzeko neurrietan aztertzen, …

Eta gizartera begira, hainbat eta hainbat gizarte eragilerekin lankidetza zuzenean dihardugu, euskalgintzaren eremukoak dira asko (Kontseilua, Soziolinguistika Klusterra, Garabide, …) eta beste eremu batzuetakoak beste asko (Bagara herrigintza, Lanki, HUHEZI, …) .

Gero eta gehiago, Euskara eta Berrikuntza Soziala gara. Horixe izan liteke Emunek duena besteen interesekoa.

Irakurtzen jarraitu...

Bihar Emuneko emakumeok* lanuztea egingo dugu

Asteazkena, 2018ko martxoaren 7a

Bozketa egin ostean, Emuneko emakumeok* lanuztea egitea erabaki dugu biharko, martxoaren 8rako. Horrez gain, herri bakoitzean antolatutako mobilizazio eta ekintzetan parte hartzeko deia zabaldu gura dugu.

Baina Emunen ere igarriko da lanuztea. Emuneko egoitza nagusiaren kanpoaldean amantalak edo zapi moreak eskegiko ditugu eta kafe makinan kutxa bat jarri dugu salatu eta aldatu nahi ditugun egoerak, bizipenak… jasotzeko. Azkenik, posta elektronikoko sinaduran greba deialdiarekin bat egiten dugula jarriko dugu.

Lanuztearen ondorioz kendutako lan aurrerakinak Euskal Herriko mugimendu feministara bideratuko ditugu.

Emuneko emakumeok* planto!

Irakurtzen jarraitu...

Kooperatibek irabaziak dituztenean, euren irabazien zati bat  banatzen dute jendartearekiko elkartasun konpromisoei erantzuteko. 2016an Emunek irabaziak izan zituen eta, hori dela eta, irabazien zati bat jendartea eraldatzeko bideetan bideratu dugu.

Orain arte, batez ere euskararen biziberritzearen inguruko elkarte eta jendarte-ekitaldiei banatu dizkiegu irabaziak Emunekook. Aurten, ostera, euskararen biziberritzearen inguruko mugimenduei ez ezik, jendarte eraldaketarako beste mugimendu batzuei ere eman diegu gure irabazien zati bat.

Euskararen biziberritzeari dagokionez, dirua inbertitu dugu, besteak beste, Korrikan, Topagunean, Tripontzian, hainbat euskara elkartetan eta guraso elkarte batzuetan. Jendarte eraldaketari dagokionez, ostera, dirua inbertitu dugu, besteak beste, Bagara elkartean, Ereindajan dendan eta Arrats elkartean. Guztira, 20.000 euro inbertitu ditugu.

Irakurtzen jarraitu...

Emuneko truke egunean Berrikuntza Soziala hizpide

Asteartea, 2017eko azaroaren 7a

Azken urteetan egin bezala, aurten ere truke eguna egin dugu Emunen. Emuneko berrikuntza arloak eta Emuneko Eraldaketa Sozialaren lantaldeak antolatuta, azaroaren 3 goizean Garaia Berrikuntza Guneko H-Enean elkartu eta Berrikuntza Sozialaren gaiaz luze eta zabal jarduteko aukera izan genuen emunkideok.

Gaiak protagonismo handia izan du aurten Emunen (“Erakundeak eta Berrikuntza Soziala” marko teorikoa osatu dugu, “Berrikuntza Sozialaren bideak” jardunaldia,…). Hala ere, gaia oso zabal da eta berau zelan landu nahi dugun argitzen jarraitzeko, berriro ere gaia Emuneko plaza handian landu nahi izan genuen.

Honako hau izan zen eguneko lelo edo goiburua:

Nola eragin dezakegu justizia sozialean eta aukera berdintasunean Emunetik eta Emunen?

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Goiburua hori kontuan izanik, emunkideei eskatu zitzaien gaiaz dituzten kezkak edota hitz egin nahiko lituzketen alderdiak identifikatzeko, horretarako zenbait galdera egin zitzatela eskatuta.

Emunkideek proposatu zituzten gaiak honako hauek izan ziren:

  • Zerk motibatzen gaitu? Non jarri nahi dugu gure aletxoa?
  • Bi gaiotan nondik hasi behar dugu: diskurtsoa berrasmatzetik edo ekintza zuzenera joaz?
  • Jakin badakigu emunkide bakoitza zertan dabilen lanetik kanpo justizia sozialarekin zerikusia izan dezakeen kontuetan?
  • Kontuan hartu behar dugu bezerogaien bisio/misioa bezeroak lortzerakoan?
  • Nola eragin behar dugu bezeroaren etxean, bezeroak eskatzen ez duenean?
  • Justizia Sozialean Emunetik eragiteko modurik egokiena zein da? Denok zerbait egin? Lan talde bat? Lan ordutan? Emunek proiektuak lideratuz?
  • Aukera berdintasunean eragin, kontratazioen bidez inklusio soziala bultzatu.
  • Zein adibide/eredu ezagutzen dugu? Eta zertan?
  • Aliantzak, sarea nola landu, norekin eta zertarako?
  • Laguntza eskaini hizkuntza beharretatik haratago (imigrazioa…)

Gaiak taldeetan landu ziren. Open Space teknika erabilita, bakoitzak nahi zuen gaia aukeratu eta lantzeko aukera izan zuen, edota nahi zuenak taldez edo gaiz aldatzekoa.

Taldeetan esandakoak idazkariek jaso zituzten. Ekarpen guztiak Eraldaketa Sozialaren lantaldean landuko dira ondoren, hau da, justizia soziala eta aukera berdintasuna EMUNETIK eta EMUNEN nola landu nahi ditugun zehaztuko ditugu.

Argi geratu zen beste behin ere gaiak jakin-mina eta gogoa sortzen duela, eta ostiralean ere gogotsu aritu ginen bakoitzak beretik gaiari ekarpenak egiten.

Irakurtzen jarraitu...

Fagor: 20 urte euskara planetan

Astelehena, 2017eko urriaren 23a

Urriaren 25a gainean dugu. Eta egun horretan, besteak beste, Fagorrek ere 10 minutuko ponentzia aurkeztuko du Berrikuntza sozialeko jardunaldian.

Zer da euskara plan bat, lan munduan?

Enpresaren egunerokoan euskararen erabilera normalizatzeko plan bat da, edo beste modu batera esanda, hala nahi duen langile orok euskaraz lan egin ahal izatea bermatu nahi duen plan bat.

20 urte esaten da. Pentsatu behar dugu, beraz, ordura arte gaztelania hutsean egiten zela lan Fagorren?

Gaztelania zen lan hizkuntza, bai. Garai horretan oraindik euskaraz alfabetatu gabeko langile asko zegon Fagorren, ikasketa guztiak gaztelera hutsez egin zituztenak, eta horrek erabat baldintzatzen zuen barne dinamika.

20 urteotako ibilbideari begiratuta, zein aldaketa edo lorpen azpimarratuko zenituzke?

Lorpenak asko izan direla esango nuke, nahiz eta oraindik bidea gelditzen zaigun egiteko. Euskararen presentzia asko handitu da Fagorreko kooperatibetan, eta kasu gehienetan erabilera datuak kooperatibak kokatuta dauden herriek dituztenak baino altuagoak dira. Beste datu esanguratsu bat aipatzearren, kooperatiba batzuetako Batzar Nagusiak euskara hutsean egiten direla aipatuko nuke, orain dela zenbait urte pentsaezina zena.

Kooperatiba eta enpresetan euskara planen bueltan egiten den lana gizarteak ezagutzen duela uste duzu? Baloratzen du gizarteak lan munduaren ekimena?

Nik esango nuke ez dela gehiegi ezagutzen, eta ondorioz, baloratu ere ez. Baina lanaren esparrua ere oso garrantzitsua da euskararen normalizazioa lortu ahal izateko.

Euskara planak hizpide Berrikuntza Sozialaren inguruko Jardunaldi batean. Berri xamarra da hori.

Baina ez da hain arraroa. Azken baten, euskara planak garaiko gizartean pil-pilean zegoen erronka edo behar sozial bati erantzuna emateko jarri ziren martxan, urte luzez debekatua egon zen gure hizkuntza berreskuratzeko erronkari, hain zuzen ere. Eta gainera hasierako bultzada hori oso oinarritik etorri zen.

Irakurtzen jarraitu...

Emuneko pertsonal burua den Amaia Etxaniz kooperatiban egindako hausnarketa eta hartutako neurrien inguruan arituko da jardunaldian.

Azken urteotan gero eta gehiago entzuten den kontziliazioa ez da gauza berria Emun kooperatibako kideentzat. Pertsonal burua den Amaia Etxanizen hitzetan, urteetan gehiegi pentsatu gabe eta halabeharrez landutako zerbait izan zen kontziliazioa. Kooperatibaren izaerari lotuta eta Emunkideen egoera pertsonalek horrela bideratuta landu zen zerbait. Hala, eszedentziak edota lan jardun murriztuak aspaldiko kontua dira kooperatiban.

Gizarteko behar bati erantzuten
Urteekin, ordea, Emunen behar eta egiteko modu partikularretatik gizarteko behar bati erantzuten ari zirela ohartu eta lanketa sakonagoari heldu zioten. Etxanizek “kontzientzia hartze bat” bezala gogoratzen ditu 2004 eta 2007 urteen artean egindako hausnarketak eta oinarri horiekin hasi ziren gero, 2010ean, kolektibo osoarekin gaia lantzen.

2012tik aurrera, berdintasuna eta kontziliazioa lanerako ardatzak dira Emunentzat. Tartean lan horren aitortza ere jaso du batean eta bestean. Emakundek Emakumeen eta Gizonen Berdintasunerako lankidetza erakunde gisa izendatu zuen 2015ean bigarrenez, eta asko dira Emunera iritzi eta laguntza eske gerturatu diren enpresa eta erakundeak.

Amaia Etxaniz, Gipuzkoako Foru Aldundiak kontziliazioaren inguruan antolatutako ekitaldi batean Emunen esperientziaren berri ematen.

Gustura lan egiteko modua
Kooperatibaren ikuspegitik, errentagarritasunean eragina dauka zalantzarik gabe: besteak beste, absentismoa mantendu egin da igo beharrean, lizentzia orduak jaitsi, eta langileari errazagoa zaio lan orduetan lanean kontzentratzea.

Modu zuzenean, noski, langilea da kontziliazioaren onuradun zuzena, eta horrek erabateko eragina dauka kooperatiban. Langileen gogobetetzeak gora egin du kontziliazio neurrien eraginez eta “lan sari ekonomikoarekin ordaintzen ez dena lan sari emozionalarekin orekatzea” lortu du Emunek.

Adibideak adibide, eta onurak onura, kontua da %62a emakumeak diren kooperatiba batean Zuzendaritzako kideen %86a direla emakumeak; eta hori ez da kasualitatea.

Irakurtzen jarraitu...

ULMA taldea ere egongo da Emunek urriaren 25ean antolatu duen Berrikuntza sozialaren bideak izeneko jardunaldian. Hori dela eta, haiekin egon gara euren proiektuaren berri izateko.

“Behar sozialei erantzun egokia emateko formula berriak” esaldi potoloa da gero. Zer ulertu behar dugu horrekin?

Bai, hori titular apur bat ponpoxoa da… Berez, formula horiek ez dira guztiz berriak, berria izan litekeena da gure jarduerari arlo sozialean eman nahi diogun sistematizazio puntua: arloak eta beraien pisua edo garrantzia zehaztu, lehentasunezko kolaboratzaileak izendatu, diru laguntzak emateko irizpide zehatzak zehaztu,…

Nondik edo zer dela eta sortu zen behar hori?

Alde batetik, ULMAn bagenituen diru laguntzak emateko irizpide orokor batzuk, baina orokorregiak ziren eta askotan izaten genituen zalantzak. Honekin, hartzen genituen erabakiek ez zeukaten oinarri sendo bat eta ez ziren justifikatzeko erreza izaten. Bestetik, diru laguntzak ematen genituen, bai, baina ez ginen proiektu sozialetan asko murgiltzen.

Zein da, orain artean Kooperatibak egiteko zuen moduarekin alderatuta, aldaketa nagusia?

Jadanik kolaboratzaile berezi batzuk izendatu ditugu eta bagabiltza beraiekin ekintzak antolatzen eta ideiak garatzen. Hortaz gain, askoz garbiago dauzkagu gauzak gure jarduera soziala bideratzeko eta baita diru laguntzak emateko ere.

Beharrak berdinak izanda ere, zergatik hasi horiei erantzuteko formula berrien bila?

Oso ikuspegi enpresariala geneukalako eta kooperatiba bat ez delako hori bakarrik, proiektu sozio-enpresariala baizik. Alderdi sozial horri behar den garrantzia emateko beharra ikusi dugu.

Nabari duzue eraginik?

Apur bat goiz da hori esateko gure bazkide eta gizartearen ikuspegitik, baina gai honetan lanean ari garenok bai nabari dugu aldaketa handiak: ipar bat daukagu, funtzionatzeko sistematika bat, bagabiltza proiektu batzuk garatzen eta ideia eta aukera pila bat irteten ari dira.

Irakurtzen jarraitu...