Albisteak

Fazilitazioaren artea

Astelehena, 2019eko apirilaren 8a

Emuneko 16 lankidek fazilitazioari buruzko formakuntza jasotzen dihardugu Manahmanaren eskutik.

Fazilitazioaren arteak, oinarrian, taldea eta elkar sortzeko prozesua du. Honelako prozesuak erraz, ulergarri eta motibagarri bilakatzeko/bideratzeko beharrezko konpetentziak eta gaitasunak lantzen jardun dugu: fazilitazioaren markoa, prozesuaren diseinua, gaitasunak, talde dinamikak, prozesuko erremintak…

Manahmanako, Aitor Guisasola eta Maialen Oregi ditugu, giro eder eta umore hobeagoz, prozesu honetako bidelagun apartak. Eskerrik asko!

Irakurtzen jarraitu...

Emun aholkulariok lankide berriak bilatzen ditugu

Osteguna, 2019eko apirilaren 4a

Emun Aholkularitzak arlo hauetan aritzeko teknikarien lan poltsa desberdinak osatu behar ditu:

– HIZKUNTZA ZERBITZUAK

– EMAKUMEEN ETA GIZONEN BERDINTASUNA

– PARTE HARTZE  PROZESUAK

– BERRIKUNTZA SOZIALEKO PROZESUAK

Bete beharrekoak:

·       Lizentziatua edo graduatua izatea

·       Euskara maila altua izatea (gutxienez EGA edo baliokidea).

·       Dagokion arloko prozesuak diseinatu, garatu eta gidatzen esperientzia izatea: euskararen normalizazioan, parte hartzean, berrikuntza sozialean, emakumeen eta gizonen berdintasunean.

·       Taldeak gidatzeko eta dinamizatzeko gaitasuna izatea

·       Proiektuen kudeaketan  esperientzia  izatea

·       Gidabaimena izatea

 

Baloratuko da:

·     Hizkuntzak ezagutzea

·     Hiznet graduondokoa izatea

·     Arlo hauetakoren batean masterra edo baliokidea izatea: parte hartzea, kultura, aniztasuna, emakumeen eta gizonen berdintasuna

·     Berrikuntza sozialarekin lotutako ikasketak izatea

·     Erantzukizun sozialaren esparruan esperientzia izatea

·     Komunikaziorako eta harremanetarako gaitasuna izatea

 

Sartu curriculuma gure webguneko Lan bila? atalean.

Azken eguna (oraingo probatarako): apirilaren 28a

Irakurtzen jarraitu...

Bihar Emuneko emakumeok* greba egingo dugu

Osteguna, 2019eko martxoaren 7a

Bozketa egin ostean, Emuneko emakumeok* martxoaren 8an greba egitea erabaki dugu.

Emakumeok* egun batzuk lehenago egin genuen asanblada eta grebaren inguruko hainbat kontuz hitz egin genuen: zaintza greba egiteko dauzkagun zailtasunak, emakume askok gu baino zaurgarritasun egoera handiagoa bizi dutela… Bozketako xehetasunak erabaki ondoren, bozkatu egin genuen. Mugimendu feministak egindako greba deialdiaren helburura eta ezaugarrietara hurbiltzeko ahalegin berezia egin dugu Emunen.

  • Kooperatibako barne araudian grebaren inguruko artikulua berraztertu eta klausula hau gehitzea adostu zuen Kontseilu Errektoreak  2019ko urtarrileko bileran: “Sektorekako deialdiak: Emuneko langileen sektore batentzako diren greba deialdietan, arauan jasotakoa sektore horretako Emunkideei aplikatuko zaie.” Artikuluaren moldaketaren ondorioz, gure araudia errespetatuz emakumeok* bakarrik izan gara asanbladan eta bozketatan parte hartu dugunak.
  • Bozketaren emaitzaren arabera, % 98ko aldeko bozkekin, greba egitea erabaki dugu. Dena den, edozein langile emakumeren bozkatzeko eskubide indibidual eta unibertsala errespetatu du Emunek.
  • Planto egiteaz gain, beste enpresa eta oro har gizartearen aurrean, grebaren bozgorailu izateko helburuarekin:
    • Hiriburuetan nahiz herri bakoitzean antolatutako mobilizazio eta ekintzetan parte hartzeko deia zabaldu dugu, eta bereziki egoitzak ditugun herrietako elkarretaratze eta manifestazioetan parte hartuko dugu.
    • Emuneko egoitza nagusiaren kanpoaldean amantalak, erosketa poltsak edo zapi moreak eskegiko ditugu.
    • Posta elektronikoko sinaduran greba deialdiarekin bat egiten dugula jarriko dugu.

Azkenik, grebaren ondorioz kendutako lan aurrerakinak Euskal Herriko mugimendu feministara  bideratuko ditugu.

Emuneko emakumeok* planto!

Irakurtzen jarraitu...

Kontziliazio erantzukidea erakundeetan

Osteguna, 2019eko urtarrilaren 31a

Urtarrilaren 29an hitzaldia eman zuten Emuneko Gurutze Mendizabalek eta Amaia Etxanizek Donostiako Gipuzkoa plazan, Etorkizuna eraikiz-eko gunean. Emunek GFAren diru-laguntzarekin 2017an kontziliazio erantzukidearen inguruan landutako berrikuntza proiektuaren berri eman zuten eta Emuneko eskarmentutik izandako bizipenetik ateratako ondorio nagusi batzuk ere konpartitu zituzten.

Proiektuaren helburua izan zen “Erakundeetan kontziliazo erantzunkidea lantzeko prozesu mailakatua diseinatzea”. Horretarako, lehenengo ingurura begiratu genuen eta Europako hainbat herrialdetako praktikak batzeaz gain, Gipuzkoako enpresetako egoeraren berri jaso eta Euskal Herriko hainbat aditurekin elkarrizketak izan genituen gaiaren inguruan. Ondoren, edozein erakundetan kontziliazio erantzukidea lantzeko prozesu proposamena diseinatu genuen Emunen eta hura baliaztatzeko eta handik ikasi eta hobetzeko proba pilotua inplementatu genuen Iraurgi Berritzen Urola Erdiko garapen eta berrikuntza agentzian.

3 ondorio nagusi atera genituen:

1. Kulturan eragin behar da: ez da nahikoa arauak eta politikak idatzita jasotzea. Oso
garrantzitsua da jendearen bizipenak, pertzepzioak, beldurrak, beharrak, nahiak…
jasotzea eta balioak ezagutzea, ondoren portaeretan, ohituretan, balioetan eragiteko.

2. Prozesuak mailakatua izan behar du: Lanketa ezin da egun batetik bestera egin,
aldaketa ez da etorriko soilik erabaki ausartak hartzetik, kultura aldaketa bat den
heinean, hobe da urratsak poliki baina sendo ematen joatea modu ordenatuan eta jasangarrian.

3. Enpresa iraunkorragoa izango da: kontziliazio erantzukidea lantzen duen enpresa,
iraunkorragoa izango da, pertsonen kudeaketako kalitatea hobetuko duelako.
Ondorioz pertsonen gogobetetzea eta inplikazioa areagotuz…. Eta honek ekarriko digu
enpresaren kalitatea (ekonomikoa, pertsonala eta soziala) eta lehiakortasuna areagotzea.

Irakurtzen jarraitu...

Emun Innovabide sareko partaide

Astelehena, 2019eko urtarrilaren 14a

2018an abian jarri zuen Trafiko sailak Innovabide ekimena martxan eta bihar izango da sarearen lehenengo lan bilera. Emunek proiektuarekin bat egin zuen eta sareko partaidea da.

Proiektuaren xedea da bide-segurtasunarekin konpromisoa duten euskal enpresen sarea sortzea, % 40 murrizteko “in itinere” eta “in mision” istripuetan hiltzen diren eta larri zauritzen diren pertsonen kopurua. Trafiko Zuzendaritzak oinarri duen Bide Segurtasunerako eta Mugikortasun Segururako eta Iraunkorrerako Plan Estrategikoan (2015-2020) biltzen diren helburu nagusietako bat da trafiko istripuak gutxitzeko.

Irakurtzen jarraitu...

6.000tik gora ahobizi eta belarriprest

Asteazkena, 2018ko azaroaren 28a

Emunek hainbat euskara plan kudeatzen ditu. Horietako batzuetan Euskaraldia jarri da martxan, hainbat aldaerarekin. Batzuetan martxoan egin dute, beste batzuetan 11 egun lehenago, inon 11 egun geroago egingo da. Guztira, 50 bat enpresa eta entitatetan jarri da martxan, Araban, Gipuzkoan, Nafarroan eta Bizkaian.

Horietan guztietan 6.000 langiletik gora hartu du bere hizkuntza ohiturak aldatzeko konpromisoa, izan ahobizi edo izan belarriprest. Euskaraldiaren erdira heldu garen honetan, 6.000 langile horiei animoa eman nahi diegu egun hauetan eta euren hizkuntza praktika aldatzeko adorea eta aholkua eman.

Irakurtzen jarraitu...

Heldu da garaia

Ostirala, 2018ko azaroaren 23a

Heldu da garaia norbanakook nahi duguna egiteko baimena ematen ikasteko, gure buruari eta besteari.

Heldu da garaia gure aurreiritziak identifikatu, berrikusi eta gainditzen ikasteko.

Heldu da garaia hizkuntza bat edo bestea erabili, ez epaitzen ikasteko.

Heldu da garaia erdaraz hitz egiten digunari euskaraz eroso erantzuten ikasteko.

Heldu da garaia euskarazko esparruan erdaraz egin eta errudun ez sentitzen ikasteko.

Heldu da garaia solaskidea bere hizkuntzan ulertzea garrantzi txikikoa ez dela ikasteko, hizkuntza berean erantzun ezin badiogu ere.

Heldu da garaia solaskideari hizkuntzaz ez duela aldatu behar adierazten ikasteko.

Heldu da garaia geure burua ahaldundu, hitza hartu eta euskara plazara eramaten ikasteko.

Heldu da garaia elkarrizketa batean bakoitzak nahi duen hizkuntza erabiltzen ikasteko.

Heldu da garaia euskaldun guztiak bistaratzeko, bakoitzak daukana eskainiz, dela belarria, dela ahoa.

Heldu da garaia irribarre baten gerizpean konplizitate berriak sortzen ikasteko.

Heldu da garaia hizkuntzen eta hiztunen arteko elkarbizitza posible dela ikasteko.

Heldu da garaia, aldaketa kolektiboak izan daitezen, aldaketa indibidualak egiteko.

Heldu da garaia hizkuntza ohiturak aldatu daitezkeela sinestu eta portaera berriak esperimentatzeko.

Heldu da da garaia entrenamendu kolektiboaren bidez, emozionalki hiztun askeak izaten ikasteko.

Heldu da Euskaraldia.

Irakurtzen jarraitu...

Aditu ikastaroan i(ra)kasten

Asteartea, 2018ko azaroaren 6a

Urriaren 31n, Hizkuntza Biziberritzeko Estrategiak Aditu Ikastaroa egiten ari diren 18 lagun izan genituen gurean, hizkuntza berreskurapenaren inguruan lanean ari diren herri indigenetako erakundeetako ordezkariak guztiak.
Hizkuntzen berreskurapen prozesuan lagungarri diren ezagutza teorikoak jasotzen ari dira Garabideren ikastaldian, baina baita euskararen berreskurapen prozesua bultzatzeko arlo desberdinetan sortu diren proiektu eta esperientzia praktikoak bisitatzen ere.
Adituko ikasleak Emunen izan ziren gure jarduna ezagutzen. Goizean Emun erakunde gisa nola dagoen eratuta azaldu genien eta zeintzuk ziren esku artean genituen proiektuak, zerbitzuak eta egitasmoak. Eguerdian, Fagor Elektronikako euskara plana bertatik bertara ezagutzeko aukera izan zuten.
Batzuentzat berria izan da kontatu dieguna, baina beste batzuekin aurreko urteetatik harremanetan geundenez, beraien proiektuetako berri izan eta lankidetza indartzeko baliatu dugu bisita.
Irakurtzen jarraitu...

Joan den urriaren 10ean zientzia zein teknologiaren sektorearen emakumeek duten parte hartzearen inguruko Engendering STEM izeneko jardunaldiak izan ziren Amsterdam hirian eta bertan izan zen Emuneko ordezkari bat ere. Bergarako Miguel Altuna lanbide heziketako institutua iaztik ari da Erasmus+ programaren baitako ekimen honetan parte hartzen Eskozia eta Herbehereetako beste erakunde batzuekin batera, neska gazteak ikasketa tekniko eta zientifikoetara nola gerturatu aztertzen. Helburua, STEM (zientzia, teknologia, ingeniaritza eta matematikak) sektorean diharduten Enpresa Txiki eta Ertainei genero berdintasuna eta aniztasunari lotutako praktika onen erakusleiho bat eskaintzea da eta praktika onen inguruko foro bat artikulatzea da.

STEM sektorea abiada izugarrian ari da hazten Europan, baina enpresek gaitasun eta ezagutza hauek dituzten pertsonak behar dituzten arren, hauek betetzeko aurreikuspenak ez dira hain positiboak, are gutxiago emakumeen parte hartzetik aztertuz gero.  Adibidez, Britainia Handian 2024 urterako 185.000 ingeniari beharko direla aurreikusten da, baina gaur eguneko ikasketa datuak aztertuta, emakumeak azpi ordezkatuta daudela argi ikusten da; ingeniaritzatan %9a besterik ez dira.

Kezka honetatik abiatuta hasi dira Europako hezkuntza erakunde hauek elkarlanean, marko komun bat ezarri eta praktika onak elkarbanatzeko dinamikak sortzen. Hortik sortu da Engendering STEM izeneko jardunaldi hau ere. Miguel Altuna Institutuak gonbidatuta Emuneko ordezkaritza batek ere parte hartu zuen Amsterdamen antolatutako bilkuran, Euskal Herriko beste hamaika eragiletako ordezkariekin batera, besteak beste, Gipuzkoako Foru Aldundia, Ikaslan, Adegi, Dikar edo Elursa enpresetako kideak.

Programa honetan parte hartzen duten eragileen aurkezpenarekin ekin zitzaion jardunaldiei, Miguel Altuna Institutua, Eskoziako Equate erakundea, City of Glasgow College eta Herbeheretako VHTOk euren proiektuaren berri eman zutelarik. Ostean, STEM esparruan emakumeen parte hartzea sustatzen ari diren hainbat kasu praktiko ezagutzeko aukera izan genuen, programan parte hartzen duten herrialdeetako adibideak aztertuz. Bazkalostean, programako eragileen artean sortu duten aurre-diagnosirako tresnaren aurkezpena ere aurreratu zuten,  erakundeetako kideek genero berdintasunaren inguruan dituzten pertzepzioak jaso eta aztertzeko baliagarri izatea espero dutena. Hiru tailer antolatu ziren gero: emakumeak sektorera gerturatzeko pausu praktikoen ingurukoa bat, hurrengo belaunaldiengana nola iritsi aztertzeko beste bat, eta egiturazko botere harremanen eta inkontzientzian ditugun aurreiritziak identifikatzeko azken bat.

Iraitz Agirre Genero berdintasuneko Emuneko aholkulariak parte hartu zuen adituen mahaiarekin amaitu zen jardunaldia. Bertan, Emunek euskara planetan egindako ibilbidearen berri eman zuen eta esperientzia horretatik genero berdintasunerako baliagarri izan daitezkeen ikasgaiak aztertu eta egokitzen ari garela aipatu zuen, besteak beste. Era berean, genero berdintasuna eta kooperatibagintzaren arteko harremanez ere mintzatu zen Agirre.

Irakurtzen jarraitu...

Euskaraz erosoago bizi gura duzu eta ez dakizu zelan? Egunerokoan dituzun arazo txiki (edo ez horren txiki) horietan laguntza behar duzu? Emunen horretan lagunduko dizugu.

Eta, horretarako, Hitzartzen webgunea zabaldu dugu. Bertan hizkuntza ohiturak aldatzeko bloga dugu, baita kontsultorioa ere. Hortaz, horren inguruko galdera edo zalantzarik izanez gero, guri helarazi ezelako arazo barik. Gainera, lagun askok euren gaineko esperientzia helarazi digute.

Irakurtzen jarraitu...